عدالت نے نالےمیں گرکرخاتون اوربچے کی ہلاکت کے معاملے میں کےایم سی اوردیگرسے جواب طلب کرلیا۔
تفصیلات کے مطابق سٹی کورٹ میں جوڈیشل مجسٹریٹ وسطی کراچی کی عدالت میں بارش کے دوران شادمان نالے میں گرکرخاتون اور بچے کی ہلاکت سے متعلق کیس کی سماعت ہوئی۔
متاثرہ شہری محمد دانش نے کے ایم سی کے خلاف ساڑھے 11 کروڑ روپے ہرجانے کا دعوی کیا جس پرعدالت نے کے ایم سی اور دیگر کو نوٹس جاری کرتے ہوئے حکام سے 24 اکتوبر تک جواب طلب کر لیا۔
کے ایم سی کے خلاف دو الگ الگ دعووں کی سماعت کے دوران ایڈووکیٹ عثمان فاروق نے دلائل دیے کہ سترہ جولائی کو کے ایم سی کی غفلت سے اہلیہ ثمن اور تین کاہ کا بیٹا اذلان جاں بحق ہوا۔ کے ایم سی بروقت حفاظتی اقدامات کرتی تو حادثہ نہ ہوتا۔
ایڈووکیٹ عثمان فاروق نے مؤقف پیش کیا کہ کے ایم سی اور ڈی ایم سی ہلاکتوں کے براہ راست ذمہ دار ہیں۔ متعدد شکایات کے باوجود انتظامیہ نے کھلے نالے پر توجہ نہیں دی۔
درخواست گزار نے عدالت سے استدعا کی کہ کے ایم سی اور ڈی ایم سی کو ہرجانہ ادا کرنے کا حکم دیا جائے۔
