محمود خان نے کہا ہے کہ حقیقی آزادی کے حصول تک پیچھے نہیں ہٹیں گے۔
تفصیلات کے مطابق آزاد حیثیت میں منتخب ضلع پشاور، خیبر، کوہاٹ، شانگلہ، دیر، سوات، چترال، باجوڑ، چارسدہ اور مردان کے بلدیاتی نمائندوں نے تحریک انصاف میں شمولیت اختیار کرلی ہے۔
وزیر اعلیٰ خیبر پختونخواہ محمود خان نے کہا کہ 100 سے زائد ویلیج و نیبرہوڈ کونسل کے چیئرمین نے پی ٹی آئی میں شمولیت کی ہے جبکہ گزشتہ روز بھی ساؤتھ اور ہری پور ریجنز کے 200 سے زائد بلدیاتی نمائندوں نے پی ٹی آئی میں شمولیت اختیار کی تھی۔
انہوں نے کہا کہ نچلی سطح پر پی ڈی ایم میں شامل تمام سیاسی جماعتوں کا صفایا کر دیا گیا ہے جبکہ عوام نے بھی اپنا فیصلہ سنا دیا ہے کہ تحریک انصاف مقبول ترین جماعت بن چکی ہے۔
ان کا کہنا تھا کہ عمران خان پاکستانی عوام اور آنے والے نسلوں کی آزادی کے لئے جنگ لڑ رہے ہیں، پاکستانی عوام کو بہت جلد چوروں اور ڈاکوؤں سے نجات مل جائے گی۔
وزیر اعلیٰ خیبر پختونخواہ محمود خان نے مزید کہا کہ حقیقی آزادی کے حصول تک پیچھے نہیں ہٹیں گے اور ہر حال میں لانگ مارچ کو کامیاب بنائیں گے۔
