فی زمانہ صبح سویرے لیموں پانی پینا دنیا بھر کے لوگوں کا معمول بن چکا ہے۔ لیموں میں انتہائی صحت بخش اجزاء پائے جاتے ہیں آپ کی مجموعی صحت کو بہتر بنانے میں مدد فراہم کر سکتے ہیں۔
ماہرین کے مطابق روزانہ صبح لیموں پانی پینے سے آپ کے جسم کو اینٹی آکسیڈنٹس، وٹامن بی اور سی، منرلز اور فلیوونائڈز کی صحت بخش مقدار مل سکتی ہے۔
یہی نہیں بلکہ یہ جادوئی مشروب اپنے اندراینٹی سوزش، اینٹی وائرل اور قوت مدافعت بڑھانے والی خصوصیات بھی رکھتا ہے جو آپ کے جسم کو انفیکشن اور صحت کے مختلف مسائل سے لڑنے میں مدد دیتاہے۔ یہ مشروب ہاضمے سے جڑے کئی مسائل کو دور کرنے کے ساتھ نظام انہضام کو تیز کرنے میں بھی اہم کردار ادا کرتا ہے۔
لیموں پانی کو غلط طرح سے تیار کرنا
کیا آپ اس لیموں کے پھل سے زیادہ سے زیادہ فائدہ اٹھا رہے ہیں؟ یا آپ کا شمار ان افراد میں ہوتا ہے جو ہر بار لیموں پانی پینے میں غلطی سے کام لیتے ہیں، جس کے نتیجے میں صحت کے بہت سے فوائد ضائع ہوجاتے ہیں۔
دیکھا گیا ہے کہ لیموں پانی بناتے وقت لوگوں کی اکثریت ایک ہی طرح کے معمول کی پیروی کرتی ہے جس میں لیموں کو کاٹ کراس کا رس نچوڑا جاتا ہے پھر اس میں آئس کیوب یا نیم گرم پانی شامل کیا جاتا ہے۔
ایک عام غلطی جو لیموں پانی بناتے وقت سب ہی لوگ کرتے ہیں وہ یہ ہے کہ وہ اس کا چھلکا پھینک دیتے ہیں جوبہت زیادہ فائدہ مند ہوتا ہے یہاں تک کہ اس میں یہ لیموں سے زیادہ صحت بخش اجزاء پائے جاتے ہیں۔
لیموں کے چھلکوں میں اس کے رس کے مقابلے میں زیادہ وٹامنزجیسے وٹامن اے، سی، فولیٹ، بیٹا کیروٹین، میگنیشیم، کیلشیم اور پوٹاشیم پایا جاتا ہے۔
لیموں پانی بنانے کا صحیح طریقہ
ایک یا دو تازہ لیموں لیں اور انہیں اپنی پسند کے مطابق کاٹ لیں۔ کچھ کٹے ہوئے لیموں کو پانی میں نچوڑ لیں لیکن تمام نہیں، نچوڑے ہوئے لیموں کے ٹکڑوں کو، مشروب میں پیس لیں، بقیہ غیر نچوڑے ہوئے سلائسزکوبھی اس میں شامل کریں، اب برف کے ٹھنڈے یا ابلتے ہوئے گرم پانی سے گلاس کو بھر لیں۔
