ملتان: اندرون سندھ ریلوے ٹریک پر سیلابی پانی کم ہونے کے بعد ٹرینوں کی مرحلہ وار بحالی شروع کردی گئی ہے۔
تفصیلات کے مطابق ریلوے ہیڈکوارٹر کی جانب سے اضافی کرایوں کے ساتھ 5 ٹرینوں کی بحالی کا نوٹیفکیشن جاری کردیا گیا ہے۔
جاری کردہ نوٹیفکیشن میں بتایا گیا کہ کراچی اور لاہور کے درمیان چلنے والی 3 جبکہ کراچی سے پشاور جانے والی 2 ٹرین بحال کی گئی ہیں۔
نوٹیفکیشن کے مطابق کراچی ایکسپریس، قرارقرم، پاک بزنس، خیبر میل اور رحمان بابا ایکسپریس کو بھی بحال کیا گیا ہے۔
واضح رہے کہ بحالی کے بعد بھی ٹرینیں تاخیر کا شکار ہیں، خیبر میل ایکسپریس مقررہ وقت سے ڈیڑھ گھنٹہ تاخیر سے ملتان پہنچے گی جبکہ رحمان بابا ایکسپریس 2 گھنٹے کا شکار ہے۔
سیلاب کے بعد ریلویز کا مرحلہ وار ٹرین آپریشن بحال کرنے کا فیصلہ
چند روز قبل پاکستان ریلویز کی جانب سے ملک بھر میں طوفانی بارشوں اور سیلاب کے بعد معطل ہو جانے والے ریلوے آپریشن کو مرحلہ وار بحال کرنے کا فیصلہ کیا گیا تھا۔
پنجاب، سندھ، بلوچستان اور کے پی کے میں بارشوں اور تباہ کن سیلاب سے ریلوے آپریشن معطل ہوکر رہ گیا تھا جسے اب جزوی طور پر بحال کرنے کا فیصلہ کیا گیا تھا۔
سیلاب کے بعد پہلے مرحلے میں مال بردار ٹرینیں بحال کی جا رہی ہیں جبکہ مسافر بردار ٹرینوں کا آپریشن اکتوبر کے پہلے ہفتے میں بحال ہوگا۔
ریلوے حکام کا کہنا تھا کہ ملک میں طوفانی بارشوں اور سیلاب سے پاکستان ریلوے کو اربوں روپے کا نقصان برداشت کرنا پڑا ہے، نقصان پر قابو پانے کیلئے حکام کی جانب سے کرائے بڑھانے پر بھی غور شروع کردیا گیا ہے۔
ترجمان ریلویز بابر علی کا کہنا تھا کہ پہلے مرحلے میں مال بردار گاڑیاں چلائی جا رہی ہیں تا کہ ٹریک کی ٹیسٹنگ کے علاوہ کوئلے، فرنس آئل اور دیگر صنعتی سامان کی ترسیل ممکن بنائی جا سکے جبکہ مسافر بردار ٹرینیں بھی جلد بحال کر دی جائیں گی۔
ترجمان کے مطابق ٹریک پر سیلابی پانی کے باعث مسافر ٹرینوں کے آپریشن کی بحالی میں تقریباً ایک ہفتہ مزید لگے گا۔
وزیر ریلوے خواجہ سعد رفیق
دوسری جانب وزیر ریلوے خواجہ سعد رفیق نے ہدایت کی کہ متاثرہ ریلوے تنصیبات کا جنگی بنیادوں پر سروے کیا جائے اور ٹریکس کی بحالی کیلئے تین شفٹوں میں کام کیا جائے۔
سبی۔ کوئٹہ سیکشن پر متاثرہ پل کی بحالی کے بعد کوئٹہ کو جلد ہی نیشنل ریلوے نیٹ ورک سے جوڑ دیا جائے گا جبکہ کراچی تک اپ ٹریک فریٹ آپریشن بحال ہونے کے بعد تین اکتوبر تک فریٹ والیم بھی معمول پر آ جائے گا۔
