عمران خان کی گرفتاری کا معاملہ؛ پی ٹی آئی رہنماؤں کا سخت ردعمل

عمران خان کی گرفتاری کے معاملے پر پی ٹی آئی رہنماؤں نے سخت ردعمل دیا ہے۔

تفصیلات کے مطابق چیئرمین  پاکستان تحریک انصاف (پی ٹی آئی) عمران خان کے قابل ضمانت وارنٹ گرفتاری جاری کر دیے گئے ہیں۔

عمران خان کے وارنٹ گرفتاری تھانہ مارگلہ کے علاقہ مجسٹریٹ رانا مجاہد نے جاری کیے۔

چیئر مین پی ٹی آئی کے  وارنٹ گرفتاری  تھانہ مارگلہ میں 20 اگست کو درج  ہونے والے مقدمے میں جاری کیےگئے۔ عمران خان کے خلاف تھانہ مارگلہ میں مقدمہ نمبر 407 درج کیا گیا تھا۔

عمران خان پر جج زیبا چوہدری ،آئی جی و دیگر پولیس افسران کو دھمکیاں دینے  کے الزام میں 504/506 اور 188/189 دفعات کے تحت مقدمہ درج کیا گیا تھا۔  مقدمے میں دفعہ 506 دھمکی آمیز بیان دینے پر درج کی گئی۔

پی ٹی آئی رہنماؤں کا ردعمل

اسد عمر

پاکستان تحریک انصاف کے سینئر رہنما اسد عمر نے سماجی رابطے کی ویب سائٹ ٹوئٹر پر اپنے ایک پیغام میں کہا کہ عمران خان کو حراست میں لینے کی غلطی ہرگز نا کرنا، بہت پچھتاؤ گے۔

ملیکہ بخاری

پی ٹی آئی رہنما ملیکہ بخاری نے عمران خان کی گرفتاری کے معاملے پر سخت ردعمل دیتے ہوئے کہا کہ رانا ثنااللہ کی ایما پر عمران خان کو گرفتار کرنے کی کوشش کی جا رہی ہے، ان کا جب بھی دل چاہتا ہے عمران خان پر مقدمہ درج کرتے ہیں۔

ان کا کہنا تھا کہ ہم جمہوریت کے تسلسل کو قائم رکھنا چاہتے ہیں، اس فسطائیت اور بربریت کی مذمت کرتے ہیں۔

انہوں نے کہا کہ اگر عمران خان کو گرفتار کرنے کی کوشش کی تو عوام سڑکوں پر ہوں گے، یہ سیاسی مقدمہ کسی کی ایما پر بن رہا ہے، عمران خان کو گرفتار کیا گیا تو ہم قانونی مذاحمت کریں گے، ہم قانون کو اپنے ہاتھ میں نہیں لینا چاہتے۔

مراد سعید

پی ٹی آئی رہنما مراد سعید نے کہا کہ کچھ دیر پہلے اطلاع ملی عمران خان کے وارنٹ گرفتاری جاری ہو گئے ہیں، اسلام آباد اور پنڈی کے لوگ بنی گالہ پہنچیں۔

ان کا کہنا تھا کہ جس طرح پہلے گرفتاری کو روکا تھا آج پھر روکیں گے۔

شاہ محمود قریشی

پاکستان تحریک انصاف کے سینئر رہنما شاہ محمود قریشی نے گرفتاری کی خبر سن کر کہا کہ عمران خان نے اپنے بیان کی وضاحت کر دی تھی، انہوں نے جج صاحبہ کی عدالت میں جا کر معذرت بھی کر لی تھی، کئی ماہرین نے عدالت کی رہنمائی بھی کی۔

ان کا کہنا تھا کہ وارنٹ گرفتاری جاری ہونے پر مجھے تعجب اور حیرانگی ہوئی ہے، ہم اپنے وکلا سے مشورہ کریں گے۔

 

 

 

Best Health Insurance Battle Creek

Leave a Comment