تھرپارکر میں جانور اسمگل کرنے والوں کے خلاف کریک ڈاؤن کیا گیا ہے۔
تفصیلات کے مطابق تھرپارکر میں محکمہ جنگلی حیات تھر پارکر کی جانب سے بڑی کارروائی کی گئی جس کے نتیجے میں ہرن اسمگلنگ کرنے کی کوشش ناکام بنا دی گئی۔
ڈپٹی ڈائریکٹر وائلڈ لائف میر اعجاز تالپور کا کہنا ہے کہ ہرن اسمگل کرنے والے دو ملزمان گرفتار کرلیے گئے ہیں جبکہ ملزمان کی شناخت دھنی بخش بھیو اور امام علی کے نام سے ہوئی ہے ۔
ڈپٹی ڈائریکٹر وائلڈ لائف میر اعجاز تالپور نے بتایا کہ ملزمان تھر کی تحصیل ڈاھلی سے ملحقہ علاقوں سے ہرن پکڑ کر حیدرآباد اسمنگل کرتے تھے البتہ اب دونوں کے خلاف وائلڈ لائف ایکٹ کے تحت مقدمہ درج کرلیا گیا ہے۔
ڈپٹی ڈائریکٹر وائلڈ لائف کا کہنا ہے کہ ہمیں اطلاع تھی اور ہم ان ملزمان کی تلاش میں تھے اور آج گرفتاری عمل میں آئی ۔
انہوں نے مزید کہا کہ تھر باسی جنگلی حیات کے تحفظ کے لیئے ہماری مدد کریں اور اپنے اپنے علاقہ جات میں شکاریوں کی راستہ بندی کریں۔
