شرجیل انعام میمن نے کہا ہے کہ پیپلز بس سروس کی ڈیمانڈ بڑھ رہی ہے، ہمیں سروس کو مزید بہتر بنانا ہے۔
تفصیلات کے مطابق وزیر ٹرانسپورٹ شرجیل میمن کی صدارت پیپلز بس سروس کے متعلق اجلاس ہوا جس میں پیپلز بس سروس کے گلشن حدید روٹ کے مسافروں کے لئے محکمہ ٹرانسپورٹ کا بڑا فیصلہ کیا گیا۔
اجلاس کی صدارت کرتے ہوئے شرجیل انعام میمن نے کہا کہ پیر سے پیپلز بس سروس گلشن حدید سے ٹاور تک چلائی جائے گی، روٹ میں تبدیلی گلشن حدید کے عوام کے مطالبہ پر کی گئی ہے، کل سے کھوکھراپار- ٹاور روٹ پر بسوں کی تعداد میں اضافہ کیا جائے گا اور 30 بسیں چلائی جائیں گی۔
انہوں نے کہا کہ پیپلز بس سروس کی ڈیمانڈ بڑھ رہی ہے، ہمیں سروس کو مزید بہتر بنانا ہے، اوور لوڈنگ کی حوصلہ شکنی کی جائے بہت زیادہ شکایت موصول ہو رہی ہیں۔
وزیر ٹرانسپورٹ نے صوبائی وزیر کی سندھ ماس ٹرانزٹ اتھارٹی کو مانیٹرنگ ٹیم تشکیل دینے کی ہدایت دیتے ہوئے کہا کہ مانیٹرنگ ٹیم روزانہ کی بنیاد پر بسوں کی بروقت روانگی، اوولوڈنگ اور دیگر معاملات کی رپورٹ مرتب کرے گی۔
انہوں نے پیپلز بس سروس کے لاڑکانہ میں آپریشنز کا جائزہ لیا اور صوبائی وزیر کی ایم ڈی ماس ٹرانزٹ اتھارٹی کو لاڑکانہ انتظامیہ سے روزانہ کی بنیاد پر رابطہ کر کے روٹس کے مسائل کو دور کرنے کی ہدایت بھی دی۔
صوبائی وزیر ٹرانسپورٹ شرجیل انعام میمن نے مزید کراچی میں پیپلز بس سروس کے نئے روٹس پر بھی ورکنگ کرنے کی ہدایت دے دی۔
اجلاس میں سیکریٹری ٹرانسپورٹ عبدالحلیم شیخ، ایم ڈی سندھ ماس ٹرانزٹ اتھارٹی، کیپٹن الطاف حسین ساریو، پروجیکٹ ڈائریکٹر پیپلز بس سروس صہیب شفیق، منیجر آپریشنز پیپلز بس سروس عبدالشکور، اسسٹنٹ ڈائریکٹر لیگل سندھ ماس ٹرانزٹ اتھارٹی بشیر حسین بھی شریک تھے۔
