لاہور کی مقامی عدالت نے بجلی چوری کے مقدمہ میں ملوث تیسری جماعت کے طالبِ علم کی عبوری ضمانت منظور کر لی۔
تفصیلات کے مطابق سیشن عدالت لاہورمیں بجلی چوری کے مقدمے میں ملوث تیسری جماعت کے طالبعلم کی عبوری ضمانت سے متعلق درخواست پر سماعت ہوئی۔
عدالت نے ملزم بچے کو 50 ہزار کے ضمانتی مچلکے جمع کروانے کا حکم دے دیا۔
لاہور کی سیشن عدالت نے تھانہ مصری شاہ کے تفتیشی افسر کو آئندہ سماعت پر ریکارڈ سمیت طلب کر لیا۔
ایڈیشنل سیشن جج اخلاق احمد نے 9 سالہ فلک شیر کی عبوری ضمانر کی درخواست پر سماعت کی۔
عدالت میں بچے کو ارشد علی جنجوعہ ایڈووکیٹ نے ضمانت کیلئے پیش کیا۔
وکیل درخواست گزار نے مؤقف پیش کیا کہ بچے پرالزام لگایا گیا ہے کہ اس نے بجلی چوری کرنے کے لیے کھمبے پر تار لگا رکھی تھی۔
درخواست گزار کے وکیل نے یہ مؤقف بھی اپنایا کہ پولیس نے مقدمہ درج کیا اور درخواست گزار بچے کو بھی گرفتار کرنے کی کوشش کی۔ عدالت سے استدعا ہے کہ بے بنیاد مقدمہ میں طالب علم کو گرفتار کیے جانے کا خدشہ ہے عبوری ضمانت منظور کی جائے۔
چنیوٹ مائنزاینڈ منرلز ریفرنس
دوسری جانب احتساب عدالت میں چنیوٹ مائنز اینڈ منرلز ریفرنس میں اسپیکر پنجاب اسمبلی سبطین خان کی جانب سے حاضری معافی کی درخواست دائرکی گئی جس میں مؤقف اپنایا گیا کہ سبطین خان مصروفیت کے باعث آج عدالت میں پیش نہیں ہو سکتے۔
درخواست میں عدالت سے استدعا کی گئی کہ عدالت ایک روزہ حاضری معافی کی درخواست منظور کرے۔
عدالت نے اسپیکر پنجاب اسمبلی سبطین خان کی ایک روزہ حاضری معافی کی درخواست منظور کرتے ہوئے عدالتی دائرہ اختیار پر دلائل آئندہ سماعت پر طلب کرلئے۔
عدالت نے سماعت 3 اکتوبر تک ملتوی کردی ، واضح رہے کہ سبطین خان نے عدالتی دائرہ اختیار کو چیلنج کررکھا ہے۔
