مریم اورنگزیب نے کہا ہے کہ آڈیو ثبوت ہے کہ کوئی غیرقانونی کام نہیں ہوا اور نہ ہی کسی کوکوئی ناجائز فائدہ پہنچایا گیا۔
تفصیلات کے مطابق اپنے ایک بیان میں وزیراطلاعات مریم اورنگزیب نے کرک میں عمران خان کے خطاب بے شرمی قرار دیا۔
انہوں نے کہا کہ بھارت سے بجلی کاپلانٹ عمران کی حکومت کی پالیسی اور قانون کے مطابق آیا، عمران صاحب ہاؤسنگ سوسائٹی کے گرڈ سٹیشن کی تنصیب کے بارے میں18 جولائی 2020 کا ہائی کورٹ ملتان بینچ کا فیصلہ پڑھ لیں۔
مریم اورنگزیب کا کہنا تھا کہ فارن فنڈنگ کے عوض پاکستان کی آزادی، خودمختاری اور معیشت کا سودا کرنے والا چیخیں مار رہا ہے جبکہ رومیتہ شیٹی ، اندردوسانج جیسے بھارتیوں سے فارن فنڈنگ لینے والا حسد چیخیں مار رہا ہے۔
ان کا یہ بھی کہنا تھا کہ آڈیو ثبوت ہے کہ کوئی غیرقانونی کام نہیں ہوا اور نہ ہی کسی کوکوئی ناجائز فائدہ پہنچایا گیا۔غصہ اس بات کا ہے کہ شہباز شریف نے کوئی پالیسی بدلی نہ زمین مانگی اور نہ ہی 5 قیراط کے ہیرے مانگے۔
مریم اورنگزیب نے کہا کہ کوئی غیرقانونی کام نہ ہونے پر عمران خان غصے سے پاگل ہوگئے ہیں، عمران خان کو غصہ اور تکلیف ہی یہ ہے کہ آڈیو سے بھی کوئی غیرقانونی چیز برآمد نہ ہوسکی۔
انہوں نے یہ بھی کہا کہ غصہ اور تکلیف ہے کہ آڈیو میں بشری بی بی کے پانچ کیرٹ ہیرے کا ذکر نہیں،خیرات کے پیسے اپنی ذات اور سیاست کے لئے استعمال کرتے رنگے ہاتھوں پکڑے کا چیخنا چلانا بنتا ہے۔
مریم اورنگزیب کا کہنا تھا کہ 190 ملین پاﺅنڈ ”بندلفافے“ میں پانچ قیراط کی انگوٹھی دینے والے کو ”عطیہ“ کرنے جیسا کوئی کام نہیں ہوا،پانچ قیراط ہیرے کے لئے حکومتی پالیسی بدلنے والا آج دوسروں پر بہتان تراشی کررہا ہے۔
وزیراطلاعات مریم اورنگزیب کا مزید کہنا تھا کہ 458 کنال زمین کے لئےحکومتی پالیسی بدلنے والاہمیشہ کی طرح آج بھی جھوٹ بول رہا ہے۔ توشہ خانہ کی پالیسی بدل کر کروڑوں روپے کی تین گھڑیوں سے منافع کمانے والاجھوٹ بولنے سے پہلے آئینہ دیکھ لیا کرے،اس آڈیو میں شوکت ترین اور آپ کے صوبائی وزرا کی پاکستان دشمن سازش جیسی کوئی بات نہیں نکلی۔
