سینئر ڈپٹی کنوینر ایم کیو ایم عامر خان نے کہا ہے کہ ایم کیو ایم سے محبت آج بھی عوام کے دلوں میں ہے۔
تفصیلات کے مطابق ایم کیوایم پاکستان کے مرکز بہادرآباد پر سینئر ڈپٹی کنوینر ایم کیو ایم عامر خان کی زیر صدارت اجلاس منعقد ہوا جس میں حلقہ این اے 239 میں ہونے والے ضمنی الیکشن کے سلسلے میں جائزہ لیا گیا۔
اجلاس کی صدارت کرتے ہوئے سینئر ڈپٹی کنوینر عامر خان نے کہا کہ ایم کیو ایم پاکستان کے خلاف مخالفین نے من گھرٹ اور جھوٹا پروپیگنڈہ شروع کیا ہوا ہے تاکہ ایم کیو ایم پاکستان کا ووٹ بینک کم کیا جا سکے لیکن ان بیوقوف اور کم عقل لوگوں کو یہ معلوم نہیں کہ ایم کیو ایم کو نہ کوئی ایسے من گھرٹ اور جھوٹے الزام لگا کر ختم کر سکتا ہے اور نہ ہی اس کے ووٹ بینک کو کم کر سکتا ہے۔
انہوں نے کہا کہ ایم کیو ایم سے محبت آج بھی عوام کے دلوں میں ہے، ہمارا اور آپ کا بنیادی فرض ہے کہ ایم کیو ایم پاکستان کے خلاف منفی پروپیگنڈہ کرنے والوں کے خلاف ڈٹ جائیں، ایم کیو ایم پاکستان کا دفاع کریں اور عوام کو حقائق سے آشنا کریں تاکہ عوام کو بھی حقیقت کا علم ہو سکے، اس کے لئے منتخب نمائندوں پر بھی بھاری ذمہ داریاں عائد ہوتی ہیں کہ حلقہ این اے239 کی عوام سے کارنر میٹنگ کر کے عوامی رابطہ مہم میں حقائق سے آگاہ کریں اور ان سے ملاقاتوں کا سلسلہ بڑھائیں۔
ان کا کہنا تھا کہ الیکشن میں ہار جیت سیاست کا حصہ ہوتی ہے، اس سے دلوں کو چھوٹا نہیں کیا جاتا بلکہ مقابلہ کیا جاتا ہے ہمیں یہ دیکھنا ہے کہ ہماری کمزوری اور کوتاہی کہاں پر ہے اس کو صحیح کر کے نئے جوش و جذبے کے ساتھ میدان عمل میں اترنا چاہیے تاکہ آئندہ ایسی کوتاہی اور کمزوریوں سے کوئی دوسرا فائدہ نہیں اٹھا سکے اس کے لئے رابطہ کمیٹی کے اراکین سمیت دیگر ذمہ داران کی کمیٹی تشکیل دی گئی ہیں جو حلقہ این اے 238 کے حلقہ میں بیٹھ کر الیکشن کے کاموں کی نگرانی کرے گی۔
سینئر ڈپٹی کنوینر ایم کیو ایم عامر خان کا مزید کہنا تھا کہ حق پرست اراکین اسمبلی کو اپنے اپنے حلقہ میں روزانہ کی بنیاد پر ڈیوٹی سر انجام دینی پڑے گی تاکہ عوام بلا ڈر و خوف اپنے لوگوں کے پاس آ کر اپنے مسائل کو حل کر وا سکیں اس کے ساتھ ساتھ حلقہ این اے 239 کی عوام سے روزانہ کی بنیاد پر ملاقاتوں کا سلسلہ جاری رکھیں اور ذمہ داران ابھی سے پولنگ ایجنٹ اور ووٹر لسٹوں کے کاموں میں زیادہ سے زیادہ بڑھ چڑھ کر حصہ لیں تاکہ حلقہ این اے 239 سے منتخب ہونے والے ایم کیو ایم پاکستان کے نامزد امیدوار نئیر رضا بھاری اکثریت سے کامیاب ہو کر عوامی مسائل کوترجیحی بنیادوں پر حل کرواسکیں۔
اس موقع پر ڈپٹی کنوینر و سابق مئیر کراچی وسیم اختر نے گفتگو کرتے ہوئے کہا کہ ایم کیو ایم پاکستان نے ہر مشکل سے مشکل حالات کا ڈٹ کر مقابلہ کیا ہے اور اللہ تعالیٰ کے فضل و کرم سے آج بھی اپنی جگہ قائم ہیں۔
انہوں نے کہا کہ حالات جیسے بھی ہوں ہمیں اپنے کنوینر خالد مقبول صدیقی پر اندھا اعتماد کرنا ہے اور اس کی پالیسی پر متفق رہنا ہے، سوشل میڈیا سمیت کسی بھی من گھرٹ خبروں پر توجہ نہیں دینی جبکہ اپنی ساری توانائیاں 16 اکتوبر کو ہونے والے ضمنی الیکشن حلقہ این اے 239 کی طرف مبزول کرانی ہے اور اس میں بھرپور محنت کرنی ہے۔
ان کا یہ بھی کہنا تھا کہ نام نہاد تمام سیاسی کھلاڑی بھی ضمنی الیکشن کے میدان میں اترے ہوئے ہیں تاکہ ان سے چکھا لگ جائے لیکن ہمیں ان سیاسی کھلاڑیوں کی نقل و حرکت پر بھی نظر رکھنی ہے اور ان کو کوئی بھی موقع نہیں دینا ہے۔
ڈپٹی کنوینر و سابق مئیر کراچی وسیم اختر نے مزید کہا کہ ہماری طاقت عوام ہے، ہم نے عوام سے جڑے رہنا ہے، اس کے لئے آپ لوگ بھی عوام کے پاس جائیں ان کے مسائل معلوم کریں اور جہاں تک ممکن ہو سکے اپنی مدد آپ کے تحت ان کے مسائل کو حل کرنے کی کوشش کریں۔
اجلاس میں اراکین رابطہ کمیٹی، سی او سی کے اراکین، مرکزی شعبہ جات کے ذمہ داران، حق پرست اراکین قومی و صوبائی اسمبلی اور دیگر ذمہ داران بھی موجود تھے۔
