چوہدری پرویز الٰہی
وزیراعلیٰ پنجاب چودھری پرویز الٰہی نے کہا ہے کہ عالمی بینک پنجاب حکومت کا اہم ترین ڈویلپمنٹ پارٹنر ہے۔
تفصیلات کے مطابق وزیر اعلیٰ پنجاب چودھری پرویز الٰہی اور سابق وفاقی وزیر مونس الٰہی سے عالمی بینک کے کنٹری ڈائریکٹر نجے بن حسائن کی قیادت میں وفد نے ملاقات کی جس میں پنجاب حکومت اور عالمی بینک کے درمیان مختلف شعبوں میں تعاون بڑھانے پر اتفاق ہوا۔
ملاقات میں عالمی بینک کے تعاون سے صوبے کے سماجی وانفراسٹرکچر سیکٹرز کی بہتری کے پروگرام پر تفصیلی بات چیت ہوئی۔
اس موقعے پر کنٹری ڈائریکٹر عالمی بینک نے تعلیم، صحت، فیملی پلاننگ، آبپاشی، زراعت اور سمال ڈیمز کی تعمیر کے حوالے سے بھی تعاون کو فروغ دینے کی یقین دہانی کرائی۔
چودھری پرویز الٰہی نے اس موقعے پر کہا کہ 35 ملین ڈالر کو پنجاب احساس پروگرام سے لنک کر کے سیلاب زدگان میں تقسیم کریں گے، عالمی بینک سے میرے دیرینہ تعلقات رہے ہیں، میرے سابقہ دور میں عالمی بینک کے تعاون سے تعلیم اور صحت میں انقلابی اصلاحات کی گئیں، میرے ایجوکیشن سیکٹر ریفارمز پروگرام کو عالمی سطح پر پذیرائی ملی۔
وزیر اعلیٰ پنجاب نے کہا کہ عالمی بینک کے ساتھ تعاون کا سلسلہ ازسرنو شروع کرنا چاہتے ہیں، ہماری حکومت نے آتے ہی ڈگری کی سطح تک تعلیم مفت کرنے کا اعلان کیا، شعبہ صحت میں ایڈہاک ڈاکٹرزاوردیگر عملے کی بھرتی کی اجازت دی ہے، ہسپتالوں میں ایمرجنسی وارڈز میں ادویات کو مفت کردیا ہے، سیلاب سے متاثرہ علاقوں میں وبائی امراض کی روک تھام کیلئے خصوصی میڈیکل کیمپس لگائے گئے ہیں، سیلاب متاثرین کی بحالی کے لئے جامع پلان مرتب کیا ہے۔
ان کا کہنا تھا کہ پانی کو محفوظ رکھنے کیلئے ڈیمز بنانے پر پوری توجہ ہے، عالمی بینک کی جانب سے پنجاب حکومت کے ساتھ تعاون کا ہر سطح پر خیر مقدم کریں گے، عالمی بینک کے ساتھ شارٹ ٹرم اورلانگ ٹرم پالیسیاں بنا کر تیزی سے آگے کی جانب بڑھیں گے، موسمیاتی تبدیلیوں کے تناظر میں کثیرالجہتی حکمت عملی مرتب کرنے کی ضرورت ہے، سیلاب اور بارشوں کے پانی کو محفوظ کرنے کیلئے واٹر سٹوریج کے منصوبے شروع کیے جائیں گے۔
انہوں نے کہا کہ عالمی بینک پنجاب حکومت کا اہم ترین ڈویلپمنٹ پارٹنر ہے، مختلف شعبوں میں مقرر کردہ اہداف کا حصول یقینی بنائیں گے، بچوں میں غذائیت کی کمی کو دور کرنے کے لئے جامع پلان پر کام کر رہے ہیں۔
کنٹری ڈائریکٹرعالمی بینک نے اس موقعے پر کہا کہ وزیراعلیٰ چودھری پرویزالٰہی کی لیڈر شپ میں پنجاب حکومت کے ساتھ تعاون جاری رکھیں گے، وزیراعلیٰ کی قیادت میں پنجاب حکومت کے تعلیم، صحت اور دیگر سماجی شعبوں میں اصلاحات کے مثبت نتائج سامنے آئیں گے، عالمی بینک پنجاب حکومت کے ساتھ قریبی کوآرڈینیشن کے تحت کام جاری رکھے گا۔
چیف سیکرٹری پنجاب عبداللہ سنبل، سابق چیئرمین پلاننگ اینڈ ڈویلپمنٹ سلمان غنی، سینئرممبر بورڈ آف ریونیو، سیکرٹری لوکل گورنمنٹ، سیکرٹری خزانہ اور اعلیٰ حکام بھی اس موقعے پر موجود تھے۔
