پاکستان میں سیلاب متاثرین کی امداد کے لئے دوست اور برادر ممالک سے امداد کا سلسلہ جاری ہے۔
اس حوالے سے ترجمان دفتر خارجہ کی جانب سے ایک بیان بھی جاری کیا گیا جس میں اب تک موصول ہونے والی امداد کے متعلق تفصیلات جاری کی گئیں ہیں۔
ترجمان دفتر خارجہ کے مطابق پاکستانی سیلاب متاثرین کے لیے اب تک 15 ممالک، 3 عالمی تنظیموں سے 123 امدادی طیارے پہنچ چکے ہیں ۔
ترجمان نے بتایا کہ متحدہ عرب امارات نے سب سے زیادہ 41 امدادی طیارے راولپنڈی، کراچی، لاہور بھیجے ہیں جبکہ امریکہ نے سیلاب متاثرین کے لیے 21 امدادی طیارے سکھر، کراچی راولپنڈی بھیجے ہیں۔
اسکے علاوہ ترکیہ نے سیلاب متاثرین کے لیے 13 طیارے امداد کراچی، راولپنڈی بھیجی ہے جبکہ چین اور قطر سے 4، 4 امدادی طیارے پاکستان آئے ہیں اور عمان سے سیلاب متاثرین کے لیے امداد لے کر 8 طیارے پاکستان پہنچے ہیں۔
سعودی عرب سے متاثرین سیلاب کے لیے 5 امدادی طیارے پاکستان پہنچ چکے ہیں جبکہ ازبکستان، فرانس، ترکمانستان، اردن، سے امداد لے کر ایک ایک طیارہ نور پاکستان پہنچا ہے ۔
نیپال، برطانیہ، روس اور یونان سے بھی ایک ایک امدادی طیارہ پاکستان پہنچا ہے جبکہ یونیسف نے 3، اقوام متحدہ ادارہ مہاجرین نے 13، عالمی ادارہ خوراک نے 3 امدادی طیارے بھیجے ہیں۔
ترکیہ سے ہلال احمر نے امدادی سامان کے 2 ٹرک، 3 ٹرینیں پاکستان بھیجیں ہیں جبکہ تاجکستان نے 87 ٹرکوں پر مشتمل امدادی قافلہ پاکستان بھیجا گیا ہے اور ایران سے ہلال احمر نے ٹرکوں کے زریعہ 100 ٹن امدادی سامان پاکستان میں پاکستانی ہلاک احمر کے حوالے کیا گیا ہے۔
عمان سے حال ہی میں ایک بحری جہاز امدادی سامان لے کر کراچی کی بندرگاہ پر لنگر انداز ہوا ہے۔
