وزیراعظم نے سعودی عرب کے قومی دن کے موقع پر ولی عہد شہزادہ محمد بن سلمان کو مبارکباد دی ہے۔
تفصیلات کے مطابق وزیر اعظم محمد شہباز شریف کا سعودی عرب کے ولی عہد اور نائب وزیر اعظم شہزادہ محمد بن سلمان بن عبدالعزیز السعود سے ٹیلیفونک رابطہ ہوا جس میں وزیراعظم نے مملکت سعودی عرب کے 92ویں قومی دن کے موقع پر ولی عہد کو مبارکباد دی۔
وزیر اعظم نے حرمین شریفین کے متولی شاہ سلمان بن عبدالعزیز اور سعودی عرب کے عوام کے لیے مبارکباد پیش کی جبکہ شہباز شریف نے سعودی عرب کے برادر عوام کی مسلسل ترقی اور خوشحالی کے لیے نیک خواہشات کا اظہار بھی کیا۔
شہباز شریف نے ولی عہد کو سیلاب کی صورتحال اور اس حوالے سے جاری امدادی اور بحالی کی کوششوں سے آگاہ کیا جبکہ ٹیلیفونک رابطے کے دوران دونوں رہنماؤں نے قریبی رابطے میں رہنے پر اتفاق کیا۔
وزیر اعظم نے خادم حرمین شریفین اور شاہ سلمان ہیومینٹیرین ایڈ اینڈ ریلیف سینٹر کی جانب سے سیلاب متاثرین کے لیے امدادی سامان کی ترسیل کے لیے ایئر بریج کے قیام، اور پاکستانی سیلاب زدگان کے لیے عام لوگوں سے عطیات وصول کرنے کے لیے مملکت میں “سہیم” پورٹل کے آغاز پر شکریہ ادا کیا۔
اس موقع پر سعودی ولی عہد نے پاکستان میں موسلا دھار بارشوں اور سیلاب سے ہونے والے قیمتی جانوں اور لوگوں کے ذریعہ معاش کے ضیاع پر تعزیت کا اظہار کیا جبکہ انہوں نے پاکستان کے سیلاب سے متاثرہ لوگوں کے لیے مملکت کی جانب سے حمایت جاری رکھنے کا یقین دلایا۔
وزیر اعظم محمد شہباز شریف نے پاکستان کے لیے سعودی مملکت کی مستقل حمایت کو سراہا اور ولی عہد کو دونوں برادر ممالک کے درمیان جاری اقدامات کی پیشرفت سے آگاہ کیا جس میں توانائی کے شعبے میں سرمایہ کاری اور تعاون میں اضافہ کے ساتھ ایک مضبوط اقتصادی شراکت داری بھی شامل ہے۔
