وزیراعلیٰ پنجاب چوہدری پرویزالہیٰ نے امدادی سرگرمیوں میں مصروف ایئرفورس کے افسروں اور جوانوں کو خراج تحسین پیش کیا ہے۔
وزیراعلیٰ چوہدری پرویزالہیٰ سے ایئر آفیسر کمانڈنگ، سنٹرل ایئر کمانڈ، پاکستان ایئر فورس، ایئر وائس مارشل ظفر اسلم کی ملاقات ہوئی جس میں سیلاب متاثرہ علاقوں میں امدادی سرگرمیوں اوربحالی کے کاموں کے حوالے سے تبادلہ خیال ہوا۔
وزیراعلیٰ چوہدری پرویزالہیٰ نے ملاقات میں سیلاب زدگان کی مدد و بحالی کیلئے ایئرفورس کی گراں قدر خدمات پر ایئر وائس مارشل ظفر اسلم کا شکریہ ادا کیا۔
ملاقات میں سیلاب متاثرین کی بحالی و آبادکاری کے لئے مشترکہ اقدامات کو مزید موثر انداز میں جاری رکھنے پر بھی اتفاق کیا گیا۔
‘متاثرین سیلاب کی بحالی اولین ترجیح ہے’
پرویزالہیٰ نے کہا کہ متاثرہ علاقوں میں ایئرفورس کی جانب سے بروقت سرگرمیاں شروع کرک ے لوگوں کو ریسکیو کیا گیا، میں پنجاب حکومت کی جانب سے امدادی سرگرمیوں میں مصروف ایئر فورس کے افسروں اور جوانوں کو خراج تحسین پیش کرتا ہوں۔
وزیراعلیٰ پنجاب نے کہا کہ متاثرین سیلاب کی بحالی اولین ترجیح ہے، پاکستان ایئرفورس کے ساتھ ملکر مصیبت زدہ بہن بھائیوں کو ریلیف کی فراہمی جاری رکھیں گے۔
انہوں نے مزید کہا کہ سماجی ترقی کیلئے پاکستان ایئر فورس کے تعاون کو قدر کی نگاہ سے دیکھتے ہیں، وطن عزیز کی فضائی حدود کی حفاظت کا فریضہ سر انجام دینے کے ساتھ قومی تعمیر و ترقی کے شعبوں میں پاک فضائیہ کی بے مثال خدمات قابل تحسین ہیں۔
اس موقع پر وزیراعلیٰ چوہدری پرویزالہیٰ نے پاکستان ایئر فورس کی پیشہ ورانہ مہارت اور صلاحیتوں کو بھی سراہا۔
دوسری جانب ایئر وائس مارشل ظفر اسلم نے کہا کہ پاکستان ایئر فورس سیلاب متاثرہ علاقوں میں پنجاب حکومت کے ساتھ ملکر بحالی و آبادکاری کے کاموں میں پورا سپورٹ کرے گی
